‘n Nellie-leerder en spiesgooier, Joshua Maas het tydens die Julie-vakansie aan die IAAF o/18 Wêreldkampioenskappe in Nairobi, Kenia deelgeneem.

Die kampioenskappe het vanaf 12-16 Julie plaasgevind en Joshua het in die o/18-kategorie deelgeneem.

Hy is tans die dubbele ASA o/18-kampioen asook die SA Skole Kampioen in spiesgooi seuns 17. Sy persoonlike beste van 73,66m (tydens SA Skole kampioenskappe in Durban vroeër die jaar) plaas hom tans in die 12de posisie op die IAAF Wêreldranglys vir o/18 seuns spiesgooi.

Joshua het 14de geëindig tydens die byeenkoms. Sy eerste poging was 75m, maar die rooi vlag is met sy tweede poging in die lug gesteek. Sy laaste gooi was 59m.

“Hoewel dit nie my beste was nie, was die ervaring onbeskryflik. Die kompetisie was taai, die stadion vol lewe en na afloop van die kampioenskappe was ek nog meer gemotiveer om harder te oefen,” sê Joshua.

Volgens Badenhorst is Joshua die tweede atleet van NHS wat die voorreg het om Suid-Afrika by ‘n wêreldkampioenskappe te verteenwoordig. Die vorige atleet is Frans Schutte wat ‘n brons medalje in gewigstoot seuns 17 by die IAAf Wêreld Jeugkampioenskappe in Bressanone Italië gewen het.